Vil hvetja þá sem eiga leið í Smáralind þessa helgina til að stara ekki ofan í gólfið eða taka stóran sveig þegar þið mætið þessum unga herramanni. Fallegt mjög væri ef sem flestir tækju þátt í örstuttri könnun hjá Stefskí mínum svo hann og partnerinn hans nái takmarki sínu um helgina. Ég sjálf reyni að forðast fólk sem er að áreita annað fólk í Smáralind og Kringlunni, en ég ætla að reyna að taka mig á í þeim málum og virða þetta veslings fólk viðlits. Sérstaklega þetta unga fólk sem er bara að reyna að vinna sér inn smá aur..

Fór annars í smá eggjahljóðaleiðangur áðan. Hitti bæði Hlyn og Helga Hrafn og guð minn góður, lyktin af þessum börnum!! Þeir eru alltaf nýbaðaðir og hreinir þegar ég hitti þá og ilmurinn er yndislegur! Ungbarnalykt er náttúrulega best í heimi en lyktin af Helga er alls ekkert síðri...Nei, ég er ekki gengin af vitinu, þetta er sannleikur! Ég held að það séu einhver efni í þessari lykt af börnum sem fær eggjastokkana til að klingja, eitthvað ávanabindandi sem fær mann til að halda að börn séu það yndislegasta í heimi. Þau eru það að sjálfsögðu en þetta með lyktina gerir mann algjörlega sjúkan í þau! Karlmenn virðast þó langflestir vera ónæmir fyrir þessu...

Allavega, ilmur af börnum og könnun hjá Stefskí í Smáralind er algjörlega málið þessa helgina!